Оқу-ағарту министрі Жұлдыз Сүлейменова мектеп директорларын ротациялау ережелеріне енгізілуі мүмкін өзгерістер туралы айтты, деп хабарлайды Педагог-KZ NUR.KZ сайтына сілтеме жасап. Министрдің айтуынша, бұл мәселеге қатысты түпкілікті шешім келесі оқу жылы басталғанға дейін қабылданады.
Қазіргі таңда мектеп директорларын ротациялау бойынша қолданыстағы ережеге сәйкес, ротация бір елді мекеннің ішінде жүргізіледі, ал бір мектепте директордың қызмет атқару мерзімі 7 жылдан аспауы тиіс.
Директорларды ротациялау мерзімін өзгерту мәселесі соңғы бірнеше айдан бері талқыланып келеді. Өткен жылдың желтоқсан айында Оқу-ағарту министрлігінің Орта білім беру комитетінің төрағасы Қаныбек Жұмашев тиісті бұйрық жобасы дайындалып жатқанын мәлімдеген болатын. Сол кезде ротацияның форматы 5+5 жыл болуы мүмкін екені айтылған.
Кейінірек Оқу-ағарту министрі Жұлдыз Сүлейменова әлеуметтік желідегі парақшасында видеоүндеу жариялап, мектеп директорларын ротациялаудың 2+2 оқу жылы моделін ұсынды.
Сондай-ақ ауыл мектептері үшін 5+5, ал қала мектептері үшін 3+3 оқу жылы форматтары да ұсынылған.
Өткен аптада министр республикалық 24KZ телеарнасына берген сұхбатында жаңа нұсқаны айтты: қала мектептері үшін 2+2 жыл, ал ауыл мектептері үшін 3+3 жыл форматы.
Министрдің сөзінше, мектеп директорларын ротациялау туралы бұйрық жобасы әлі де сарапшылар және педагогикалық қауымдастықпен талқыланады. Түпкілікті шешім келесі оқу жылы басталғанға дейін қабылданады.