Мәжіліс депутаты Қарақат Әбден премьер-министрдің орынбасары Қанат Бозымбаевқа жолдаған депутаттық сауалында шалғай ауылдағы білікті кадрлар мәселесін көтерді,-деп хабарлайды Педагог- KZ.
" Ауыл тұрғындарымен кездесуде біз көбіне маман тапшылығы туралы шағымдар естиміз. Қазір механизатор, агроном, сауыншы, ветеринар жетіспейді. Қазірдің өзінде 60 мыңнан астам маман тапшы және бұл сан арта түспек. Әсіресе Солтүстік Қазақстан, Ақтөбе, Жамбыл және Алматы облыстарында кадр тапшылығы қатты сезіледі. Жастар ауылдан кетуде, себебі олар мансаптық өсу мүмкіндіктерін көрмейді", - деді депутат Мәжіліс отырысында.
Ол Президент ауыл шаруашылығы өнеркәсібі үшін кадрлар даярлау және ауылды ұлттық саясаттың негізгі бағыттарының бірі ретінде дамыту қажеттігін айтқанын еске салды.
"Бүгінде жастарды оқытып қана қоймай, өздерін туған жерінде өсіп-өнуіне жағдай жасау керек. Ол үшін мектептерде агропрофильді білім беруді енгізу керек. Мәселені шешудің жолы ретінде ауыл мектептерінде агропрофильді сыныптар құрылуы керек. 7 - 11-сынып оқушылары механикаландыру, агрономия, ветеринария, мал шаруашылығы және агробизнес негіздерін үйренеді", - деді өз ұсынысында Қ. Әбден.
Осылайша, депутат Оқу-ағарту министрлігіне ауыл мектептерінде агробейінді оқытудың мемлекеттік бағдарламасын әзірлеуді, ал ауыл шаруашылығы министрлігіне мектептердің дуалды оқыту үшін ауыл шаруашылығы кәсіпорындарына қолжетімділігін қамтамасыз етуді ұсынды.
Сонымен қатар, депутат Еңбек және халықты әлеуметтік қорғау министрлігіне Агроөнеркәсіптік кешенде жұмыс істеуге дайын түлектерге арналған жеңілдіктер мен гранттар жүйесін енгізуді, ал Ұлттық экономика министрлігіне бұл бағдарламаны ауылды дамыту жөніндегі ұлттық жобаға енгізуді ұсынды.