Оқу-ағарту министрлігі Ы.Алтынсарин атындағы Ұлттық білім академиясы республикалық мемлекеттік кәсіпорнының президенті бос лауазымына конкурс жариялады,- деп хабарлайды Педагог-KZ министрлікке сілтеме жасап.
Айта кету керек, академияның негізгі қызметі – еліміздің білім беру жүйесін ғылыми-әдістемелік және әдіснамалық тұрғыда қамтамасыз ету. Академия аясында мемлекеттік жалпыға міндетті білім беру стандарттары мен үлгілік оқу жоспарлары мен бағдарламалары әзірленеді.
Академия президенттігіне кандидаттыққа жоғары және (немесе) жоғары оқу орнынан кейінгі білімінің болуы, салада басшылық лауазымдарда кемінде 5 жыл жұмыс өтілінің болуы секілді талаптар қойылған.
18 жасқа толмағандар, бұрын сыбайлас жемқорлық қылмыс жасағандар, соттылығы өтелмеген немесе алынбаған азаматтар және Қазақстан заңнамасына сәйкес басқа да шектеулерге ілінетіндер конкурсқа қатыса алмайды.
Құжаттар 2026 жылдың 9 – 19 қаңтар аралығында қабылданады делінген министрлік ақпаратында.
Айта кету керек, Ы.Алтынсарин атындағы Ұлттық білім академиясын небәрі жарты жылдай басқарған Нәзипа Аюбаева 2025 жылдың 1 желтоқсанында қызметінен кетті.